മാറുന്ന സിനിമക്കനുസരിച്ച് പുതിയ ദൃശ്യാനുഭവം കാഴ്ചവെക്കാൻ പൃഥ്വിരാജ് എന്ന സംവിധായകന് കഴിയുന്നു; പ്രശംസയുമായി മോഹൻലാൽ
രണ്ടു ദിവസം മുൻപാണ് മലയാള സിനിമയെ ഒന്നടങ്കം അമ്പരപ്പിച്ചു കൊണ്ട് മോഹൻലാൽ നായകനായ എമ്പുരാൻ എന്ന ബ്രഹ്മാണ്ഡ ചിത്രത്തിന്റെ ടീസർ പുറത്ത് വിട്ടത്. പൃഥ്വിരാജ് സുകുമാരൻ ഒരുക്കിയ ഈ ചിത്രം മാർച്ച് 27 നാണു ആഗോള റിലീസായി പ്രേക്ഷകരുടെ മുന്നിലെത്തുക. ടീസർ ലോഞ്ച് ചെയ്ത ചടങ്ങിൽ നായകനായ മോഹൻലാൽ പൃഥ്വിരാജ് എന്ന സംവിധായകനെ കുറിച്ച് പറഞ്ഞ വാക്കുകൾ ഏറെ ശ്രദ്ധ നേടി.
മാറുന്ന സിനിമക്കനുസരിച്ച് പുതിയ ദൃശ്യാനുഭവം സമ്മാനിക്കാൻ കഴിവുള്ള സംവിധായകനാണ് പൃഥ്വിരാജ് എന്നും, ഒരു നടനിൽ നിന്ന് അയാളുടെ ഏറ്റവും മികച്ച പ്രകടനം എടുക്കാൻ കഴിവുള്ള സംവിധായകൻ കൂടിയാണ് പൃഥ്വിരാജ് എന്നും മോഹൻലാൽ പറയുന്നു. ഇന്ത്യൻ സിനിമയിലെ ഏറ്റവും മികച്ച സംവിധായകരുടെ നിരയിലാണ് താൻ പൃഥ്വിരാജ് എന്ന സംവിധായകനെ കാണുന്നത് എന്നും തനിക്ക് ഏറെ പ്രതീക്ഷയുള്ള സംവിധായകനാണ് പൃഥ്വിരാജ് എന്നും അദ്ദേഹം പറഞ്ഞു.
പൃഥ്വിരാജ് സംവിധായകനായതിൽ താനുൾപ്പെടെ ഉള്ളവർ ഒരു കാരണമായി എന്നതിൽ സന്തോഷമുണ്ടെന്നും, സിനിമയുടെ എല്ലാ മേഖലകളെ കുറിച്ചും അറിവുള്ള വ്യക്തികൂടിയാണ് പൃഥ്‌വി എന്നും മോഹൻലാൽ കൂട്ടിച്ചേർത്തു. ഈ ചിത്രം ഒരു വലിയ വിജയമായി തീരുമെന്നുള്ള പ്രതീക്ഷയും മോഹൻലാൽ ചടങ്ങിൽ പങ്കു വെച്ചു. പൃഥ്വിരാജ് സംവിധാനം ചെയ്ത മൂന്നാം ചിത്രമാണ് എമ്പുരാൻ.
ലൂസിഫർ, ബ്രോ ഡാഡി എന്നീ പൃഥ്‌വിയുടെ ആദ്യ രണ്ടു ചിത്രങ്ങളിലും മോഹൻലാൽ ആയിരുന്നു നായകൻ. ടൈസൺ, ലൂസിഫർ 3 എന്നിവയാണ് ഇനി പൃഥ്വിരാജ് ഒരുക്കുമെന്ന് പ്രഖ്യാപിച്ചിട്ടുള്ള ചിത്രങ്ങൾ. മുരളി ഗോപി തിരക്കഥ രചിച്ച എമ്പുരാൻ നിർമ്മിച്ചിരിക്കുന്നത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ, ലൈക്ക പ്രൊഡക്ഷൻസിന്റെ ബാനറിൽ സുബാസ്കരൻ എന്നിവർ ചേർന്നാണ്.
