സർപ്പത്തിൻ്റെ പ്രതികാര കഥ പറയുന്ന ‘ഫണി’; കാതറിൻ ട്രീസ നായികയാവുന്ന ചിത്രത്തിന്റെ പോസ്റ്റർ പുറത്ത്…
ഡോ. വി. എൻ. ആദിത്യയുടെ സംവിധാനത്തിൽ ഒരുങ്ങുന്ന ‘ഫണി’ എന്ന ചിത്രത്തിൻ്റെ മോഷൻ പോസ്റ്റർ ഇതിഹാസ സംവിധായകൻ കെ. രാഘവേന്ദ്ര റാവു ഹൈദരാബാദിൽ വെച്ച് പുറത്തിറക്കി. ഒഎംജി പ്രൊഡക്ഷൻസിൻ്റെ ബാനറിൽ ഡോ. മീനാക്ഷി അനിപിണ്ടിയും എയു ആൻഡ് ഐ സ്റ്റുഡിയോയും ചേർന്നാണ് ഈ ചിത്രം നിർമ്മിക്കുന്നത്. ഒരു സർപ്പത്തിൻ്റെ പ്രതികാര കഥ പറയുന്ന ചിത്രത്തിൽ കാതറിൻ ട്രീസയാണ് നായിക. ഹോളിവുഡ് നടൻ മഹേഷ് ശ്രീരാമും ചിത്രത്തിൽ ശ്രദ്ധേയമായ കഥാപാത്രത്തെ അവതരിപ്പിക്കുന്നുണ്ട്. ഹിന്ദി, തെലുങ്ക്, തമിഴ്, കന്നഡ, മലയാളം കൂടാതെ മറ്റ് അന്താരാഷ്ട്ര ഭാഷകളിലും ചിത്രം റിലീസിനെത്തും.
“ആദിത്യ എന്നാൽ സൂര്യൻ എന്നാണ് അർത്ഥം. സൂര്യൻ എല്ലാ രാജ്യങ്ങളിലും ഉദിക്കും. അതുപോലെ വി. എൻ. ആദിത്യയുടെ ‘ഫണി’ ഒരു ആഗോള സിനിമയായിരിക്കും. ആദിത്യ എന്റെ പ്രിയപ്പെട്ടവരിലൊരാളാണ്. പുതുമുഖങ്ങളെയും താരങ്ങളെയും വെച്ച് സിനിമകൾ ചെയ്യാനുള്ള കഴിവ് അദ്ദേഹത്തിനുണ്ട്. അദ്ദേഹത്തിൻ്റെ സഹോദരി മീനാക്ഷിയാണ് ഈ ചിത്രം നിർമ്മിക്കുന്നത്. അല്ലു അർജുൻ്റെ ‘സരൈനോടു’ എന്ന ചിത്രത്തിൽ എംഎൽഎയുടെ വേഷത്തിൽ വന്ന കാതറിനെ എനിക്കോർമ്മയുണ്ട്. ഈ സിനിമയിൽ അവർ ഏത് തരം കഥാപാത്രത്തെയാണ് അവതരിപ്പിക്കുന്നതെന്ന് കാണാൻ ഞാൻ കാത്തിരിക്കുകയാണ്. ‘ഫണി’യുടെ മുഴുവൻ ടീമിനും എൻ്റെ ആശംസകൾ. ചിത്രം വലിയ വിജയം നേടുമെന്ന് ഞാൻ പ്രതീക്ഷിക്കുന്നു”, മോഷൻ പോസ്റ്റർ പ്രകാശനം ചെയ്ത് കെ. രാഘവേന്ദ്ര റാവു പറഞ്ഞു.
“ഞാൻ അമേരിക്കയിലേക്ക് പോകുമ്പോഴെല്ലാം എന്റെ സഹോദരി മീനാക്ഷിയുടെയും സഹോദരീഭർത്താവ് ശാസ്ത്രി ഗാരിയുടേയും വീട്ടിലാണ് താമസിക്കുന്നത്. ഞങ്ങൾ പലതവണ കണ്ടുമുട്ടിയിട്ടുണ്ടെങ്കിലും ഒരുമിച്ച് ഒരു സിനിമ നിർമ്മിക്കുക എന്നത് ഒരിക്കലും മനസ്സിൽ വന്നില്ല. അവരുടെ ഒഎംജി പ്രൊഡക്ഷൻസിൻ്റെ ബാനറിൽ ഒരു സിനിമ ചെയ്യാൻ അവർ വാഗ്ദാനം ചെയ്തപ്പോൾ, ഞാൻ ആദ്യം ഭയപ്പെട്ടു. നന്നായി തയ്യാറെടുത്ത് സിനിമയിലേക്ക് വരുന്ന നിർമ്മാതാക്കളുണ്ട്. എന്നാൽ മീനാക്ഷി എന്നെ വിശ്വസിച്ച് ഈ ചിത്രം നിർമ്മിക്കാൻ തീരുമാനിച്ചു. അതുകൊണ്ട് ഞാൻ എല്ലാ തയ്യാറെടുപ്പുകളും നടത്തി. ഒരു ചെറിയ ചിത്രമായി ആരംഭിച്ച ‘ഫണി’ കാതറിൻ ട്രീസ ഈ സിനിമയിൽ അഭിനയിക്കാൻ സമ്മതിച്ചതോടെ മറ്റൊരു തലത്തിലേക്ക് എത്തി. ഇതൊരു ആഗോള സിനിമയായി മാറി. മഹേഷ് ശ്രീറാമും ഞങ്ങളുമായി വളരെ സഹകരിച്ചു. ഞങ്ങളുടെ മുഴുവൻ ടീമും ‘ഫണി’യിൽ ആവേശത്തോടെ പ്രവർത്തിക്കുന്നു. ചിത്രം ഉടൻ തന്നെ തിയേറ്ററുകളിലെത്തും”, സംവിധായകൻ വി. എൻ ആദിത്യ പറഞ്ഞു.
“ഇതിഹാസ സംവിധായകൻ രാഘവേന്ദ്ര റാവു ‘ഫണി’യുടെ മോഷൻ പോസ്റ്റർ പുറത്തിറക്കിയതിൽ എനിക്ക് സന്തോഷമുണ്ട്. ഒഎംജി പ്രൊഡക്ഷൻസ് നിർമ്മിക്കുന്ന ആദ്യ ചിത്രമാണിത്. ഒരു ചെറിയ സിനിമയായി ആരംഭിച്ച ‘ഫണി’ ഇന്ന് ഒരു ആഗോള സിനിമയായി മാറിയിരിക്കുന്നു. എന്റെ സഹോദരൻ വി. എൻ. ആദിത്യയുടെ സിനിമകൾ ഞാൻ തിയേറ്ററുകളിൽ മാത്രമേ കണ്ടിട്ടുള്ളൂ. ആദ്യമായാണ് ഞാൻ ഇതുപോലെ ഒരു വേദിയിൽ സംസാരിക്കുന്നത്. ‘ഫണി’യിലെ അഭിനയത്തിന് കാതറിൻ ദേശീയ അവാർഡ് നേടുമെന്ന് ഞാൻ വിശ്വസിക്കുന്നു. അവർ ചെയ്ത ഓരോ രംഗവും അത്ര മനോഹരമാണ്. കാതറിനോടൊപ്പം പാമ്പും ഈ ചിത്രത്തിൽ നിർണായകമാണ്. എന്റെ സഹോദരൻ പാമ്പിനെ വരെ ഓഡിഷൻ ചെയ്തു. മഹേഷ് ശ്രീറാം ഞങ്ങൾക്ക് കുടുംബം പോലെയാണ്. ഞങ്ങളുടെ ബാനറിൽ കൂടുതൽ സിനിമകൾ നിർമ്മിക്കാൻ ഞങ്ങൾ പ്രതീക്ഷിക്കുന്നു. നിങ്ങളുടെ തുടർച്ചയായ പിന്തുണ പ്രതീക്ഷിക്കുന്നു”, നിർമ്മാതാവും സംഗീത സംവിധായികയുമായ ഡോ. മീനാക്ഷി അനിപിണ്ടി പറഞ്ഞു.
കോ-പ്രൊഡ്യൂസർ ശാസ്ത്രി അനിപിണ്ടി, തിരക്കഥാകൃത്ത് പത്മ, താരങ്ങളായ മഹേഷ് ശ്രീറാം, കാസി വിശ്വനാഥ്, കാതറിൻ ട്രീസ, നേഹ കൃഷ്ണ, തനികെല്ല ഭരണി, കാശി വിശ്വനാഥ്, രഞ്ജിത, യോഗിത, പ്രശാന്തി ആരതി, സാന്യ, ആകാശ്, അനിൽ ശങ്കരമാഞ്ചി, കിരൺ ഗുഡിപ്പള്ളി, ബാല കര്രി, ദയാകർ തുടങ്ങിയവർ ചടങ്ങിൽ പങ്കെടുത്തു.
ബാനർ: ഒഎംജി പ്രൊഡക്ഷൻസ്, വിതരണം: പദ്മനാഭ റെഡ്ഡി (എയു ആൻഡ് ഐ സ്റ്റുഡിയോ), കഥ, തിരക്കഥ, സംവിധാനം: ഡോ. വി. എൻ. ആദിത്യ. പത്മാവതി മല്ലടിയുമായി ചേർന്നാണ് സിനിമയുടെ തിരക്കഥ ഒരുക്കിയിരിക്കുന്നത്. ഛായാഗ്രഹണം: ബുജ്ജി കെ, സായ് കിരൺ ഐനംപുഡി, എഡിറ്റർ: ജുനൈദ്, സംഗീത സംവിധാനം: മീനാക്ഷി അനിപിണ്ടി, വിഎഫ്എക്സ്: ഹെന്‍റ്രി, ബെവർലി ഫിലിംസ്, ലോസ് ഏഞ്ചൽസ്, സ്റ്റണ്ട്സ്: ജോൺ കാൻ, പബ്ലിസിറ്റി ഇൻചാർജ് ആൻഡ് ഡിജിറ്റൽ: മമത റെഡ്ഡി കസം, പിആർഒ: ജിഎസ്കെ മീഡിയ (സുരേഷ്-ശ്രീനിവാസ്), ആതിര ദിൽജിത്ത്.
