പുതിയ ‘ബാബ’യുടെ ആദ്യ കാഴ്ചകളുമായി ഗംഭീര ട്രെയിലർ പുറത്ത്…
ഏകദേശം രണ്ട് പതിറ്റാണ്ടുകൾക്ക് ശേഷം ഈ വർഷം ഡിസംബർ 12 ന് രജനികാന്തിന്റെ ജന്മദിനത്തിൽ അദ്ദേഹത്തിന്റെ 2002ലെ ചിത്രം ‘ബാബ’ പുതിയ രൂപത്തിൽ റിലീസ് ചെയ്യുക ആണ്. റിലീസിന് ദിവസങ്ങൾ മാത്രം ബാക്കി നിൽക്കുമ്പോൾ കോമഡി, ആക്ഷൻ, റൊമാൻസ് തുടങ്ങി എല്ലാ വാണിജ്യ ഘടകങ്ങളും നിറഞ്ഞ ചിത്രത്തിന്റെ ആവേശകരമായ ഒരു ട്രെയിലർ നിർമ്മാതാക്കൾ അനാച്ഛാദനം ചെയ്തിരിക്കുക ആണ്. ട്വിറ്ററിൽ ട്രെയിലർ പങ്കുവെച്ചുകൊണ്ട് രജനികാന്ത് ട്വീറ്റ് ചെയ്തത് ഇങ്ങനെ, “എന്റെ ഹൃദയത്തോട് എന്നെന്നേക്കുമായി അടുത്തിരിക്കുന്ന ഒരു സിനിമ. ബാബ റീമാസ്റ്റർ ചെയ്ത പതിപ്പ് ഉടൻ റിലീസ് ചെയ്യും”. ‘ഞാൻ വരുന്നു’ എന്ന രജനികാന്തിന്റെ ട്രെയിലറിലെ ഡയലോഗും ശ്രദ്ധേയമാകുന്നുണ്ട്.
മികച്ച നിലവാരമുള്ള ഓഡിയോയും ഡിജിറ്റൽ പ്രിന്റുമായി ആണ് ബാബ എത്തുക. രജനികാന്ത് ഒരു നിരീശ്വരവാദിയായി എത്തുന്ന ചിത്രമാണ് ബാബ. മഹാവതാർ ബാബാജി ഏഴ് ആഗ്രഹങ്ങൾ അനുവദിച്ചുകൊണ്ട് കൊടുക്കുകയും അത് അദ്ദേഹത്തിന് രാഷ്ട്രീയത്തിലേക്കുള്ള വാതിൽ തുറന്നുകൊടുക്കുകയും ജീവിത പാത എന്നെന്നേക്കുമായി മാറുകയും ചെയ്യുന്നത് ആണ് ബാബയുടെ കഥ. സംവിധായകൻ സുരേഷ് കൃഷ്ണ ആണ് ചിത്രം സംവിധാനം ചെയ്തത്. രജനികാന്ത് തന്നെയാണ് ചിത്രത്തിന് കഥയും തിരക്കഥയും നിർമ്മാണവും ഒക്കെ നിർവഹിച്ചത്.
ഈ ചിത്രത്തിൽ ഗൗണ്ടമണി, സുജാത, എം എൻ നമ്പ്യാർ, ആശിഷ് വിദ്യാർത്ഥി, സയാജി ഷിൻഡെ, സംഗവി, കരുണാസ് എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. എ ആർ റഹ്മാനാണ് ചിത്രത്തിലെ ഗാനങ്ങളും പശ്ചാത്തല സംഗീതവും ഒരുക്കിയത്. റീ റിലീസ് പ്രഖ്യാപിച്ച് രജനികാന്തിന്റെ പിആർ ടീം ഒരു പ്രസ് റിലീസും പുറത്തിറക്കിയിട്ടുണ്ട്. “തീർത്തും പുതിയ ആംഗിളിൽ നിന്ന് വീണ്ടും എഡിറ്റ് ചെയ്ത പുതിയ ലുക്കോടെ ചിത്രം വീണ്ടും ഒരു പുതിയ പ്രദർശനത്തിന് ഒരുങ്ങുകയാണ്. മാത്രവുമല്ല, എല്ലാ ഫ്രെയിമുകളും നൂതന സാങ്കേതിക വിദ്യയ്ക്ക് അനുസൃതമായി കളർ ഗ്രേഡിംഗ് ഉപയോഗിച്ച് ഡിജിറ്റലായി മെച്ചപ്പെടുത്തിയിരിക്കുന്നു. ‘മായ മായ’, ‘ശക്തി കൊടു’ എന്നിങ്ങനെ എ.ആർ.റഹ്മാന്റെ ഉജ്ജ്വലമായ സംഗീതം നിറഞ്ഞ ചിത്രത്തിലെ എല്ലാ ഗാനങ്ങളും റീമിക്സ് ചെയ്ത് ഡോൾബി മിക്സ് സൗണ്ട് സിസ്റ്റത്തിലേക്ക് മാറ്റിയിട്ടുണ്ട്.”, പ്രസ് റിലീസിൽ പറയുന്നു. ട്രെയിലർ:
