ഓഡിയോ ട്രെയിലറിന് പിന്നാലെ ‘വടക്കനി’ലെ ഗാനവും ശ്രദ്ധ നേടുന്നു…
സൂപ്പർ നാച്ചുറൽ ത്രില്ലർ ‘വടക്കനി’ലെ വ്യത്യസ്തമായ ഗാനം പുറത്തിറങ്ങി. ‘കേട്ടിങ്ങോ നിങ്ങ കേട്ടിങ്ങോ നിങ്ങ വെള്ളിടിവെട്ടും കൊടിത്തോറ്റം’ എന്ന് തുടങ്ങുന്ന ഗാനം എഴുതിയിരിക്കുന്നത് ബികെ ഹരിനാരായണനും ഈണം നൽകിയിരിക്കുന്നത് ബിജിബാലും ആലപിച്ചിരിക്കുന്നത് ഭദ്ര രാജിനുമാണ്. ഗാനത്തിന്റെ ലിറിക്കൽ വീഡിയോ പതിപ്പ് ആണിപ്പോൾ പുറത്തിറങ്ങിയിരിക്കുന്നത്. വിവിധ അന്താരാഷ്‌ട്ര ചലച്ചിത്ര മേളകളില്‍ പ്രദര്‍ശിപ്പിക്കുകയും ഏറെ ശ്രദ്ധിക്കപ്പെടുകയും ചെയ്ത വടക്കൻ മാർച്ച് ഏഴിനാണ് തിയേറ്ററുകളിൽ എത്തുന്നത്.
സജീദ് എ സംവിധാനം ചെയ്ത വടക്കൻ എന്ന ചിത്രത്തിന്റെ ഓഡിയോ ട്രെയിലർ ലോഞ്ച് അടുത്തിടെ നടന്നിരുന്നു. മലയാള സിനിമയിലെ ആദ്യത്തെ ഓഡിയോ ട്രെയിലർ ആണിത്. സംഗീത സംവിധായകൻ ബിജിബാലും നിർമ്മാതാവ് ജയ്ദീപ് സിങ്ങും ചേർന്നാണ് ചിത്രത്തിന്റെ ഓഡിയോ ട്രെയിലർ പുറത്തിറക്കിയത്. ചിത്രത്തിൽ ശബ്‍ദം ഒരു പ്രധാന പങ്ക് വഹിക്കുന്നതിനാലാണ് ഓഡിയോ ട്രെയിലർ റിലീസിന് തങ്ങൾ മുൻഗണന നൽകിയത് എന്ന് ലോഞ്ചിന് ശേഷം മാധ്യമങ്ങളെ അഭിസംബോധന ചെയ്തുകൊണ്ട് ബിജിബാൽ പറഞ്ഞു.
ബിജിബാലിന്റെ വാക്കുകൾ ഇങ്ങനെ: “ഈ ചിത്രത്തിൽ ശബ്‍ദം ഒരു പ്രധാന പങ്ക് വഹിക്കുന്നുണ്ട്, അതിനാലാണ് ഒരു ഓഡിയോ ട്രെയിലറിലൂടെ അതിന്‍റെ റിലീസിന് ഞങ്ങൾ മുൻഗണന നൽകിയത്.ചിത്രത്തിന്റെ ശബ്‍ദ രൂപകൽപ്പനയിലും അതിന്‍റെ സങ്കീർണ്ണമായ ഘടകങ്ങളിലും കൗതുകം ജനിപ്പിക്കുക എന്നതാണ് ലക്ഷ്യം. റസൂൽ പൂക്കുട്ടിയും സാജിദും ഞാനും ചേർന്ന് വിഭാവനം ചെയ്ത ഈ ആശയം ഒരു സുപ്രധാന ചുവടുവെപ്പാണ്. ഓഡിയോ ട്രെയിലർ പുറത്തിറക്കുന്ന മലയാള സിനിമയിലെ ആദ്യ ചിത്രമെന്ന നിലയിൽ ഇത് ഗണ്യമായ ശ്രദ്ധ നേടുമെന്ന് ഞങ്ങൾ പ്രതീക്ഷിക്കുന്നു”. ചിത്രത്തിന്റെ അനന്ത സാധ്യതകളെക്കുറിച്ച് ശുഭാപ്തിവിശ്വാസം പ്രകടിപ്പിച്ചുകൊണ്ട് നിർമ്മാതാവ് ജയ്ദീപ് സിംഗ്, ഗായിക ഭദ്ര രാജിൻ എന്നിവരും പരിപാടിയിൽ സംസാരിച്ചു.
ദ്രാവിഡ പുരാണങ്ങളും പഴങ്കഥകളും അടിസ്ഥാനമാക്കിക്കൊണ്ട് അത്യാധുനിക ഡിജിറ്റൽ സാങ്കേതികവിദ്യയും ഗ്രാഫിക്‌സും ശബ്‍ദ, ദൃശ്യ വിന്യാസങ്ങളുമെല്ലാമായിട്ടാണ് ‘വടക്കൻ’ ഒരുക്കിയിരിക്കുന്നത്. കേരളീയ പശ്ചാത്തലത്തിലാണെങ്കിലും ഹോളിവുഡിനെ വെല്ലുന്ന സാങ്കേതിക തികവാണ് നിർമാതാക്കളായ ഓഫ്ബീറ്റ് സ്റ്റുഡിയോസ് ഉദ്ദേശിക്കുന്നത്. മലയാളികൾക്കും കേരളത്തിന് പുറത്തുള്ളവർക്കും വിദേശികൾക്കും ഒരുപോലെ ആസ്വദിക്കാൻ കഴിയുന്ന ചിത്രമായിരിക്കും ‘വടക്കൻ’ എന്നാണ് നിർമ്മാതാക്കളായ ഓഫ്ബീറ്റ് സ്റ്റുഡിയോയിലെ ജയ്ദീപ് സിംഗ്, ഭവ്യ നിധി ശർമ്മ എന്നിവരുടെ ആത്മവിശ്വാസം.
പുരാതന വടക്കേ മലബാറിലെ നാടോടിക്കഥകളുടെ കഥാതന്തുവിൽ ഒരുങ്ങുന്ന ഒരു സൂപ്പർനാച്ചുറൽ ത്രില്ലറാണ് ‘വടക്കൻ’. ഓസ്കർ ജേതാവ് റസൂൽ പൂക്കുട്ടി സൗണ്ട് ഡിസൈൻ ഒരുക്കുന്ന ചിത്രത്തിന്റെ ഛായാഗ്രഹണം നിർവഹിച്ചത് ജാപ്പനീസ് ഛായാഗ്രഹക കെയ്കോ നകഹാര ആണ്. ഉണ്ണി ആറിന്‍റേതാണ് തിരക്കഥയും സംഭാഷണങ്ങളും. ബിജിപാൽ സംഗീതം നൽകുന്നു. ആഗോളതലത്തിൽ ശ്രദ്ധേയയായ പാക് ഗായിക സെബ് ബംഗാഷ് ബിജിബാലിനും ബോളിവുഡിലെ പ്രശസ്ത ഗാനരചയിതാവായ ഷെല്ലെയ്ക്കുമൊപ്പം ഒരുക്കിയ ഒരു പ്രണയ ഗാനം ‘വടക്കനി’ൽ ആലപിച്ചിട്ടുണ്ട്.
ഇന്ത്യയിലും വിദേശത്തുമുള്ള ഏറ്റവും മികച്ച സിജിഐ ടീമാണ് ചിത്രത്തിന്റെ വിഎഫ്എക്സ് ഒരുക്കുന്നത്. കിഷോർ, ശ്രുതി, മെറിൻ ഫിലിപ്പ്, മാലാ പാർവ്വതി, രവി വെങ്കട്ടരാമൻ, ഗാർഗി ആനന്ദൻ, ഗ്രീഷ്മ അലക്സ്, കലേഷ് രാമാനന്ദ്, കൃഷ്ണ ശങ്കർ, ആര്യൻ കതൂരിയ, മീനാക്ഷി ഉണ്ണികൃഷ്ണൻ, സിറാജ് നാസർ, രേവതി തുടങ്ങിയവർ ആണ് ചിത്രത്തിലെ അഭിനേതാക്കൾ. പുരാതന വടക്കേ മലബാറിലെ നാടോടിക്കഥകളുടെ കഥാതന്തുവിൽ ഒരുങ്ങുന്ന ഈ സൂപ്പർനാച്ചുറൽ ത്രില്ലർ മലയാളം കൂടാതെ കന്നഡയിലേക്ക് മൊഴിമാറ്റിയും തിയേറ്ററുകളിൽ എത്തും.
