നജീബിന് അഞ്ച് ഭാഷകളിലും ഒരേ ശബ്ദം; ‘ആടുജീവിതം’ ഡബ്ബിംഗ് പൂർത്തിയാക്കി പൃഥ്വിരാജ്…
മലയാളത്തിന്റെ യുവ സൂപ്പർതാരം പൃഥ്വിരാജ് സുകുമാരന്റെ കരിയറിലെ തന്നെ ഏറ്റവും വലിയ ചിത്രമായ ആടുജീവിതം ഈ വരുന്ന മാർച്ച് 28 നു ആഗോള റിലീസായി പ്രേക്ഷകരുടെ മുന്നിലെത്തുകയാണ്. ബെന്യാമിൻ രചിച്ച പ്രശസ്തമായ നോവൽ ആസ്പദമാക്കി ബ്ലെസി രചിച്ചു സംവിധാനം ചെയ്ത ഈ ചിത്രം വിഷ്വൽ റൊമാൻസ് ഇമേജ് മേക്കർസ്, ജെറ്റ് മീഡിയ പ്രൊഡക്ഷൻസ്, അൾട്ട ഗ്ലോബൽ മീഡിയ എന്നിവയുടെ ബാനറിൽ ബ്ലെസ്സി, ജിമ്മി ജീൻ ലൂയിസ്, സ്റ്റീവൻ ആഡംസ് എന്നിവർ ചേർന്നാണ് നിർമ്മിച്ചിരിക്കുന്നത്. സംഗീത മാന്ത്രികൻ എ ആർ റഹ്മാനാണ് ഈ ചിത്രത്തിന്റെ സംഗീത സംവിധാനം നിർവഹിച്ചത്. ഈ അടുത്തിടെയാണ് ആട് ജീവിതത്തിന്റെ ഓഡിയോ ലോഞ്ച് നടന്നത്.
ഇപ്പോഴിതാ, ഈ ചിത്രത്തിന്റെ എല്ലാ ഭാഷകളിലെയും ഡബ്ബിങ് പൂർത്തിയായതായി അറിയിച്ചിരിക്കുകയാണ് പൃഥ്വിരാജ് സുകുമാരൻ. ഇതിന്റെ മലയാളം വേർഷൻ ലൈവ് സൗണ്ടിലാണ് ഷൂട്ട് ചെയ്തിരിക്കുന്നത്. മലയാളം കൂടാതെയുള്ള, തമിഴ്, തെലുങ്ക്, ഹിന്ദി, കന്നഡ വേർഷനുകളാണ് പൃഥ്വിരാജ് തന്നെ ഡബ്ബ് ചെയ്തിരിക്കുന്നത്.
#AADUJEEVITHAM #TheGoatLife Malayalam (live sound), Tamil, Telugu, Kannada and Hindi dubbing done! To have lived this whole character arc once, and then to revisit it 4 more times in 4 different languages! E-P-I-C!
Relive the unbelievable true story of Najeeb in theatres… pic.twitter.com/elbLCg3tLR— Prithviraj Sukumaran (@PrithviOfficial) March 14, 2024
നേരത്തെ സലാർ എന്ന പാൻ ഇന്ത്യൻ ചിത്രത്തിന്റെ വിവിധ ഭാഷാ പതിപ്പുകളിലും പൃഥ്വിരാജ് തന്നെയാണ് തന്റെ കഥാപാത്രത്തിനായി ശബ്ദം നൽകിയത്. ഈ ചിത്രത്തിലെ നജീബ് എന്ന കേന്ദ്ര കഥാപാത്രത്തെ അവതരിപ്പിക്കാൻ വേണ്ടി വലിയ രീതിയിലാണ് പൃഥ്വിരാജ് ശരീര ഭാരം കുറച്ചത്. അമല പോൾ, റിക് അബി, താലിബ് മുഹമ്മദ് എന്നിവരും വേഷമിട്ട ഈ ചിത്രത്തിന് കാമറ ചലിപ്പിച്ചത് സുനിൽ കെ എസ്, സൗണ്ട് ഡിസൈനിങ് നിർവഹിച്ചത് ഓസ്കാർ അവാർഡ് ജേതാവായ റസൂൽ പൂക്കുട്ടി, എഡിറ്റ് ചെയ്തിരിക്കുന്നത് ശ്രീകർ പ്രസാദ് എന്നിവരാണ്.
ജോർദാനിൽ വെച്ചായിരുന്നു ഈ ചിത്രത്തിന്റെ പ്രധാന ഭാഗങ്ങൾ ചിത്രീകരിച്ചത്. പാൻ ഇന്ത്യൻ ചിത്രമായി എത്തുന്ന ആട് ജീവിതത്തിലൂടെ പൃഥ്വിരാജ് സുകുമാരന്റെ അഭിനയ ജീവിതത്തിലെ ഏറ്റവും മികച്ച പ്രകടനമായിരിക്കും കാണാൻ പോകുന്നതെന്ന പ്രതീക്ഷയിലാണ് സിനിമാ പ്രേമികളും ആരാധകരും.
Content Summary: Prithviraj completes Aadujeevitham dubbing in five languages
