സത്യൻ അന്തിക്കാട് – മോഹൻലാൽ ചിത്രം ‘ഹൃദയപൂർവം’ ആരംഭിക്കുന്നു; ഐശ്വര്യ ലക്ഷ്മിക്ക് പകരം മാളവിക മോഹനൻ
കംപ്ലീറ്റ് ആക്ടർ മോഹൻലാലിനെ നായകനാക്കി സത്യൻ അന്തിക്കാട് ഒരുക്കാൻ പോകുന്ന ഏറ്റവും പുതിയ ചിത്രമായ ഹൃദയപൂർവം ഫെബ്രുവരി പത്തിന് ആരംഭിക്കുന്നു. പത്ത് വർഷത്തിന് ശേഷം മോഹൻലാൽ – സത്യൻ അന്തിക്കാട് ടീം ഒന്നിക്കുന്ന ഈ ചിത്രം ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് നിർമ്മിക്കുന്നത്.
ഇപ്പോഴിതാ, ചിത്രത്തിലെ നായികാ വേഷം ചെയ്യുമെന്ന് നേരത്തെ പ്രഖ്യാപിച്ചിരുന്ന ഐശ്വര്യ ലക്ഷ്മിക്ക് പകരം പ്രശസ്ത തെന്നിന്ത്യൻ താരം മാളവിക മോഹനൻ നായികയായി എത്തുമെന്നുള്ള വാർത്തകളാണ് വരുന്നത്. സംവിധായകൻ സത്യൻ അന്തിക്കാട് തന്നെയാണ് ഈ വിവരം പുറത്ത് വിട്ടത്. ഡിസംബറിൽ ഷൂട്ടിംഗ് ആരംഭിക്കാനിരുന്ന ചിത്രം ഫെബ്രുവരിയിലേക്ക് നീണ്ടപ്പോൾ ഉണ്ടായ ഡേറ്റ് ക്ലാഷ് കാരണമാണ് ഐശ്വര്യ ലക്ഷ്മി ചിത്രത്തിൽ നിന്ന് പിന്മാറിയത് എന്നാണ് സൂചന. ദളപതി വിജയ് ചിത്രം മാസ്റ്ററിൽ ഉൾപ്പെടെ നായികാ വേഷം ചെയ്ത മാളവിക അടുത്തിടെ ബോളിവുഡിലും അരങ്ങേറ്റം കുറിച്ചിരുന്നു.
ശ്രീനിവാസൻ ചിത്രം ചിന്താവിഷ്ടയായ ശ്യാമളയിലൂടെ മലയാളികളുടെ പ്രിയങ്കരിയായ സംഗീതയും പ്രേമലുവിലൂടെ ശ്രദ്ധ നേടിയ സംഗീത് പ്രതാപും ചിത്രത്തിൽ വേഷമിടുന്നുണ്ട്. ഇവരെ കൂടാതെ ലാലു അലക്സ്, സിദ്ദിഖ്, ജനാർദ്ദനൻ എന്നിവരാണ് ചിത്രത്തിലെ മറ്റു താരങ്ങൾ. സത്യൻ അന്തിക്കാടിന്റെ മകനും സംവിധായകനുമായ അഖിൽ സത്യൻ രചിച്ച കഥക്ക് തിരക്കഥ ഒരുക്കിയത് നവാഗതനായ സോനു ടി പി ആണ്. സത്യൻ അന്തിക്കാടിന്റെ മറ്റൊരു മകനും സംവിധായകനുമായ അനൂപ് സത്യനാണ് ഈ ചിത്രത്തിന്റെ അസ്സോസിയേറ്റ് ഡയറക്ടർ.
സൂഫിയും സുജാതയും എന്ന ചിത്രത്തിലൂടെ ശ്രദ്ധ നേടിയ അനു മൂത്തേടത്ത് ദൃശ്യങ്ങൾ ഒരുക്കുന്ന ഈ ചിത്രത്തിന്റെ കലാസംവിധാനം നിർവഹിക്കുന്നത് ആട് ജീവിതത്തിലൂടെ ശ്രദ്ധ നേടിയ പ്രശാന്ത് മാധവ് ആണ്. തമിഴിലെ സൂപ്പർഹിറ്റ് സംഗീത സംവിധായകൻ ജസ്റ്റിൻ പ്രഭാകറാണ് ഹൃദയപൂർവത്തിന് വേണ്ടി സംഗീത സംവിധാനം നിർവഹിക്കുന്നത്.
