ഹനുമാന് ശേഷം തേജ് സജ്ജയുടെ അടുത്ത ബ്രഹ്മാണ്ഡ ചിത്രം; ‘മിറൈ’ ടീസർ പുറത്ത്

ഹനുമാന് ശേഷം തേജ് സജ്ജയുടെ അടുത്ത ബ്രഹ്മാണ്ഡ ചിത്രം; ‘മിറൈ’ ടീസർ പുറത്ത്

‘ഹനു-മാൻ’ എന്ന ചിത്രത്തിലൂടെ രാജ്യമെമ്പാടും തരംഗം സൃഷ്ടിച്ച യുവതാരം തേജ് സജ്ജ നായകനാവുന്ന പുതിയ പാൻ-ഇന്ത്യൻ സിനിമ ‘മിറൈ’യുടെ ടീസർ പുറത്തിറങ്ങി. കാർത്തിക് ഘട്ടമനേനി സംവിധാനം ചെയ്യുന്ന ഈ ചിത്രം 2025 സെപ്റ്റംബർ 5ന് ലോകമെമ്പാടുമുള്ള തിയേറ്ററുകളിൽ എത്തും. ഒരു സൂപ്പർ യോദ്ധാവായാണ് തേജ് സജ്ജ ‘മിറൈ’യിൽ പ്രേക്ഷകർക്ക് മുന്നിലെത്തുന്നത്. പീപ്പിൾ മീഡിയ ഫാക്ടറിയുടെ ബാനറിൽ ടി.ജി. വിശ്വ പ്രസാദും കൃതി പ്രസാദും ചേർന്നാണ് ഈ ബിഗ് ബജറ്റ് ചിത്രം നിർമ്മിക്കുന്നത്.

ആക്ഷനും ഫാൻ്റസിയും മിത്തും ഇഴചേരുന്ന ഒരു ഗംഭീര ദൃശ്യാനുഭവമായിരിക്കും “മിറൈ” എന്ന് ടീസർ ഉറപ്പുനൽകുന്നു. അതിശയിപ്പിക്കുന്ന വിഷ്വൽ എഫക്റ്റുകളും ഉദ്വേഗഭരിതമായ ആക്ഷൻ രംഗങ്ങളും ചിത്രത്തിൻ്റെ പ്രധാന ആകർഷണമായിരിക്കുമെന്നും ടീസർ സൂചന നൽകുന്നു. “ഒൻപത് പുസ്തകങ്ങൾ, നൂറു ചോദ്യങ്ങൾ, ഒരു ദണ്ഡ്” എന്ന നിഗൂഢമായ വാചകത്തോടെയാണ് ടീസർ അവതരിപ്പിച്ചിരിക്കുന്നത്, ഇത് സിനിമയുടെ ഇതിവൃത്തത്തെക്കുറിച്ച് പ്രേക്ഷകരിൽ ആകാംക്ഷ നിറയ്ക്കുന്നു. “ഹനുമാനി”ലെ കഥാപാത്രത്തിൽ നിന്ന് വ്യത്യസ്തമായി, “മിറൈ”യിലെ സൂപ്പർ യോദ്ധാവിൻ്റെ വേഷപ്പകർച്ചയ്ക്കായി തേജ് സജ്ജ വലിയ ശാരീരിക മാറ്റങ്ങളാണ് വരുത്തിയിരിക്കുന്നത്.

ചിത്രത്തിൽ വില്ലൻ കഥാപാത്രത്തെ അവതരിപ്പിക്കുന്നത് റോക്കിംഗ് സ്റ്റാർ മനോജ് മഞ്ചുവാണ്. ഇരുവരും തമ്മിലുള്ള സംഘട്ടന രംഗങ്ങൾ സിനിമയുടെ ഹൈലൈറ്റുകളിൽ ഒന്നായിരിക്കുമെന്നാണ് അണിയറപ്രവർത്തകരുടെ പ്രതീക്ഷ. റിതിക നായക് ആണ് ചിത്രത്തിലെ നായികയായി എത്തുന്നത്. കാർത്തിക് ഘട്ടമനേനിയുടെ സംവിധാന മികവിൽ, വെള്ളിത്തിരയിൽ ഒരു പുതിയ ലോകം തന്നെ സൃഷ്ടിക്കാനാണ് “മിറൈ” ടീം ലക്ഷ്യമിടുന്നത്. ഇതിൻ്റെ സൂചനകൾ ടീസറിലെ ദൃശ്യങ്ങളിൽ നിന്നും വ്യക്തമാണ്.

ജയറാം, ശ്രിയ ശരൺ, ജഗപതി ബാബു, രാജേന്ദ്രനാഥ് സ്യൂച്ഷി, പവൻ ചോപ്ര, തൻജ കെല്ലർ തുടങ്ങി വലിയൊരു താരനിര തന്നെ ചിത്രത്തിൽ അണിനിരക്കുന്നുണ്ട്. എട്ട് ഇന്ത്യൻ ഭാഷകളിൽ 2D, 3D ഫോർമാറ്റുകളിലാണ് “മിറൈ” റിലീസ് ചെയ്യുക.

സംവിധാനം, തിരക്കഥ: കാർത്തിക് ഘട്ടമനേനി, നിർമ്മാതാക്കൾ: ടിജി വിശ്വ പ്രസാദ് & കൃതി പ്രസാദ്, ബാനർ: പീപ്പിൾ മീഡിയ ഫാക്ടറി, സഹനിർമ്മാതാവ്: വിവേക് ​​കുച്ചിഭോട്ല, എക്‌സിക്യൂട്ടീവ് പ്രൊഡ്യൂസർ: സുജിത്ത് കുമാർ കൊല്ലി, ചീഫ് കോ-ഓർഡിനേറ്റർ: മേഘശ്യാം, ഛായാഗ്രഹണം: കാർത്തിക് ഘട്ടമനേനി, സംഗീതം: ഗൗര ഹരി, കലാസംവിധാനം: ശ്രീ നാഗേന്ദ്ര തങ്കാല, രചന: മണിബാബു കരണം, പിആർഒ: ശബരി