ആഗോള ശ്രദ്ധ നേടിയ കിലി പോളിൻ്റെ ജീവിതം വെള്ളിത്തിരയിലേക്ക്; ‘മാസായി വാരിയർ’ ഒക്ടോബറിൽ ചിത്രീകരണം ആരംഭിക്കും
സോഷ്യൽ മീഡിയയിൽ തരംഗമായി മാറിയ ടാൻസാനിയൻ ഇൻഫ്ലുവൻസർ കിലി പോളിൻ്റെ ജീവിതം അഭ്രപാളിയിലേക്ക്. ഇന്ത്യൻ സിനിമാ ഗാനങ്ങൾക്ക് ലിപ് സിങ്ക് ചെയ്തും ചടുലമായ നൃത്തച്ചുവടുകളിലൂടെയും മലയാളികളുടെ ‘ഉണ്ണിയേട്ടൻ’ ആയി മാറിയ കിലി പോളിന്റെ അവിശ്വസനീയമായ ജീവിതകഥ ഉടൻ വെള്ളിത്തിരയിലെത്തും. ലോകമെമ്പാടുമുള്ള 10.4 ദശലക്ഷത്തിലധികം ഇൻസ്റ്റാഗ്രാം ആരാധകരുള്ള യൂസഫ് കിംസേര എന്ന കിലി പോളിൻ്റെ ജീവിതം “മാസായി വാരിയർ” എന്ന പേരിൽ സിനിമയാക്കുന്നു. ഒക്ടോബറിൽ ചിത്രീകരണം ആരംഭിക്കുന്ന ഈ ബഹുഭാഷാ ചിത്രം സതീഷ് തൻവിയാണ് സംവിധാനം ചെയ്യുന്നത്.
ഒരു ‘ടാൻസാനിയൻ സിനിമാറ്റിക് യാത്ര’ എന്ന ടാഗ്‌ലൈനോടുകൂടിയുള്ള ചിത്രത്തിൻ്റെ പോസ്റ്റർ അണിയറപ്രവർത്തകർ പുറത്തിറക്കി. കിലി പോൾ തന്നെയാണ് ഈ ചിത്രത്തിൽ നായക കഥാപാത്രത്തെ അവതരിപ്പിക്കുന്നത്. കിലിയുടെ ജന്മസ്ഥലമായ ടാൻസാനിയയിലായിരിക്കും ചിത്രത്തിൻ്റെ പ്രധാന ലൊക്കേഷനുകൾ. മലയാളത്തിൽ കിലി പോൾ ആദ്യമായി അഭിനയിച്ച ‘ഇന്നസെൻ്റ്’ എന്ന ചിത്രത്തിന് ശേഷം സതീഷ് തൻവി സംവിധാനം ചെയ്യുന്ന സിനിമ കൂടിയാണിത്.
കേരളത്തിൽ മാത്രമല്ല, ലോകമെമ്പാടുമുള്ള പ്രേക്ഷകരിലേക്ക് എത്താൻ ലക്ഷ്യമിട്ട്, മാറ്റിനി പ്രൈം പ്രൊഡക്ഷൻസ്, തീയേറ്റർ സ്റ്റോറീസ് എന്നീ ബാനറുകളിൽ പ്രിയദർശിനി പി.എം, നജുമുദീൻ എന്നിവർ ചേർന്നാണ് “മാസായി വാരിയർ” നിർമ്മിക്കുന്നത്. മലയാളം, ഇംഗ്ലീഷ്, സ്വാഹിലി, സിംഹള, ഫ്രഞ്ച്, പോളിഷ്, സ്പാനിഷ്, ടാഗലോഗ്, ജർമ്മൻ, അറബിക്, ഉസ്ബെക്കിസ്ഥാൻ, ഹിന്ദി, കന്നഡ, തമിഴ്, തെലുങ്ക്, ബംഗാളി, ഉറുദു, ജാപ്പനീസ്, പഷ്തോ, സിന്ധി, ബലൂച്, പഞ്ചാബി തുടങ്ങിയ 25-ൽ അധികം ഭാഷകളിലായിരിക്കും ചിത്രം ഒരുങ്ങുന്നത്.
നിഖിൽ എസ് പ്രവീൺ ഛായാഗ്രഹണം നിർവഹിക്കുന്ന ഈ ചിത്രത്തിൻ്റെ തിരക്കഥ ഒരുക്കുന്നത് പി.വി ഷാജികുമാറാണ്. കിലി പോളിന് പുറമെ, ടാൻസാനിയൻ താരങ്ങളും ഏതാനും ഇന്ത്യൻ താരങ്ങളും ചിത്രത്തിൽ പ്രധാന വേഷങ്ങളിലെത്തുമെന്ന് നിർമ്മാതാക്കൾ അറിയിച്ചു. പബ്ലിസിറ്റി ഡിസൈൻ: ടെൻ പോയിൻ്റ്സ്, പി. ആർ.ഓ: പി.ശിവപ്രസാദ്
