കന്നഡ സിനിമയിൽ അനുരാഗ് കശ്യപിന് അരങ്ങേറ്റം; സ്‌പോർട്സ് ഡ്രാമ ‘8’ വരുന്നു…
ബോളിവുഡ് സിനിമയിൽ തന്റേതായ വ്യക്തിമുദ്ര പതിപ്പിച്ച അനുരാഗ് കശ്യപ് കന്നഡ സിനിമയിലേക്ക്. സുജയ് ശാസ്ത്രി സംവിധാനം ചെയ്യുന്ന ‘8’ എന്ന സ്‌പോർട്സ് ഡ്രാമയിലൂടെയാണ് അനുരാഗ് കന്നഡ സിനിമയിൽ അരങ്ങേറ്റം കുറിക്കുന്നത്. എവിആർ എന്റർടെയ്ൻമെന്റിന്റെ ബാനറിൽ അരവിന്ദ് വെങ്കിടേഷ് റെഡ്ഡിയാണ് ചിത്രം നിർമ്മിക്കുന്നത്. വ്യത്യസ്തമായ സിനിമകളിലൂടെ ശ്രദ്ധേയനായ അനുരാഗ് കശ്യപ് നടനെന്ന നിലയിൽ തെന്നിന്ത്യൻ സിനിമയിൽ സജീവമാണ്. എങ്കിലും ആദ്യമായാണ് ഒരു കന്നഡ സിനിമയുടെ ഭാഗമാകുന്നത്.
പ്രശസ്ത നടനും സംവിധായകനുമായ സുജയ് ശാസ്ത്രിയുടെ സംവിധാനത്തിൽ ഒരുങ്ങുന്ന ‘8’ ഒരു സ്‌പോർട്സ് ഡ്രാമയാണ്. ചിത്രത്തിന്റെ ടൈറ്റിൽ വളരെ വ്യത്യസ്തമായ രീതിയിലാണ് അണിയറ പ്രവർത്തകർ പുറത്തിറക്കിയത്. ഇത് സിനിമയെക്കുറിച്ചുള്ള പ്രേക്ഷകരുടെ ആകാംക്ഷ വർധിപ്പിച്ചിട്ടുണ്ട്. അനുരാഗ് കശ്യപിന്റെ കന്നഡ സിനിമയിലേക്കുള്ള വരവ് കന്നഡ സിനിമ പ്രേമികൾക്ക് ആവേശം നൽകുന്നു.
‘ബെൽ ബോട്ടം’, ‘ഗുബ്ബി മേലേ ബ്രഹ്മാസ്ത്ര’, ‘ശാഖഹാരി’ തുടങ്ങിയ ചിത്രങ്ങളിലൂടെ ശ്രദ്ധേയനായ സുജയ് ശാസ്ത്രിയുടെ തിരക്കഥയിൽ സുജയ് ജെയിംസ് ബാലുവാണ് ചിത്രത്തിന്റെ ഇതിവൃത്തം ഒരുക്കിയിരിക്കുന്നത്. അനുരാഗ് കശ്യപ് പ്രധാന കഥാപാത്രത്തെ അവതരിപ്പിക്കുന്ന ചിത്രത്തിലെ മറ്റ് അഭിനേതാക്കളുടെ വിവരങ്ങൾ ഇതുവരെ പുറത്തുവിട്ടിട്ടില്ല.
എവിആർ എന്റർടൈൻമെന്റിന്റെ ബാനറിൽ അരവിന്ദ് വെങ്കിടേഷ് റെഡ്ഡിയാണ് ചിത്രം നിർമ്മിക്കുന്നത്. മാതാപിതാക്കളായ ശ്രീ എച്ച് വെങ്കിടേഷ് റെഡ്ഡി, ശ്രീമതി ഭാഗ്യലക്ഷ്മി എന്നിവരുടെ അനുഗ്രഹത്തോടെ എവിആറും അരവിന്ദും ചേർന്നാണ് നിർമ്മാണ സംരംഭം ആരംഭിച്ചത്. നിർമ്മാതാവെന്ന നിലയിൽ തന്റെ വ്യക്തിമുദ്ര പതിപ്പിച്ച അരവിന്ദ് ഈ ചിത്രത്തിലൂടെ കന്നഡ സിനിമയിലേക്ക് ചുവടുവയ്ക്കുകയാണ്.
ജോയ്സ് ആണ് ചിത്രത്തിന് സംഗീതം നൽകുന്നത്. മൃഗാശിര ശ്രീകാന്ത് സംഭാഷണങ്ങൾ ഒരുക്കുന്നു. ഗുരുപ്രസാദ് നർനാദ് ഛായാഗ്രഹണവും പ്രതീക് ഷെട്ടി എഡിറ്റിംഗും നിർവഹിക്കുന്നു. സുജയ് ശാസ്ത്രി സംവിധാനം ചെയ്യുന്ന ‘8’, സിമ്പിൾ സുനി സംവിധാനം ചെയ്യുന്ന ‘റിച്ചി റിച്ച്’ എന്നിവയാണ് എവിആർ എന്റർടൈൻമെന്റിന്റെ നിർമ്മാണത്തിലുള്ള പ്രധാന ചിത്രങ്ങൾ. പിആർഒ- ശബരി.
