സ്റ്റൈലിഷ് ലുക്കിൽ ദുൽഖർ; നഹാസ് ഒരുക്കുന്ന ‘ഐ ആം ഗെയിം’ ഫസ്റ്റ് ലുക്ക് പുറത്ത്

സിനിമാ പ്രേമികളുടെ നീണ്ട കാത്തിരിപ്പിന് വിരാമമിട്ടുകൊണ്ട് ദുൽഖർ സൽമാൻ നായകനാകുന്ന പുതിയ ചിത്രം “ഐ ആം ഗെയിം” ൻ്റെ ഫസ്റ്റ് ലുക്ക് പോസ്റ്റർ പുറത്തിറങ്ങി. ‘ആർഡിഎക്സ്’ എന്ന ബ്ലോക്ക്ബസ്റ്റർ ഹിറ്റിന് ശേഷം നഹാസ് ഹിദായത്ത് സംവിധാനം ചെയ്യുന്ന ഈ ചിത്രത്തിൽ അതീവ സ്റ്റൈലിഷ് ലുക്കിലാണ് ദുൽഖർ പ്രത്യക്ഷപ്പെടുന്നത്. ആരാധകരെ ആവേശത്തിലാഴ്ത്തുന്ന ഒരു മാസ്സ് പരിവേഷമാണ് പോസ്റ്ററിൽ താരത്തിന് നൽകിയിരിക്കുന്നത്. വേഫെറർ ഫിലിംസിന്റെ ബാനറിൽ ദുൽഖർ സൽമാനും ജോം വർഗീസും ചേർന്നാണ് ഈ ബിഗ് ബഡ്ജറ്റ് ചിത്രം നിർമ്മിക്കുന്നത്.
ദുൽഖർ സൽമാന്റെ കരിയറിലെ നാല്പതാം ചിത്രമെന്ന പ്രത്യേകതയുമായാണ് “ഐ ആം ഗെയിം” എത്തുന്നത്. ചിത്രത്തിലെ മറ്റ് സുപ്രധാന കഥാപാത്രങ്ങളുടെ പോസ്റ്ററുകൾ നേരത്തെ തന്നെ റിലീസ് ചെയ്തിരുന്നെങ്കിലും, നായകന്റെ ലുക്ക് പുറത്തുവിട്ടിരുന്നില്ല. ഇപ്പോൾ ദുൽഖറിന്റെ ഫസ്റ്റ് ലുക്ക് കൂടി എത്തിയതോടെ ചിത്രത്തെക്കുറിച്ചുള്ള പ്രതീക്ഷകൾ വാനോളമുയർന്നിരിക്കുകയാണ്. മലയാളത്തിലെ എന്നത്തെയും വലിയ ആക്ഷൻ ഹിറ്റുകളിൽ ഒന്നായ ആർഡിഎക്സിന് ശേഷം നഹാസ് ഒരുക്കുന്ന ചിത്രം എന്ന നിലയിൽ പ്രേക്ഷകർ വലിയ ആകാംഷയോടെ ഉറ്റുനോക്കുന്ന പ്രോജക്റ്റ് കൂടിയാണിത്.
വൻ താരനിരയാണ് ചിത്രത്തിൽ അണിനിരക്കുന്നത്. ആന്റണി വർഗീസ്, പ്രശസ്ത തമിഴ് സംവിധായകനും നടനുമായ മിഷ്കിൻ, കതിർ, പാർത്ഥ് തിവാരി, തമിഴ് നടി സംയുക്ത വിശ്വനാഥൻ എന്നിവർ ചിത്രത്തിൽ നിർണ്ണായക വേഷങ്ങൾ കൈകാര്യം ചെയ്യുന്നു. സജീർ ബാബ, ഇസ്മായിൽ അബൂബക്കർ, ബിലാൽ മൊയ്തു എന്നിവർ ചേർന്നാണ് ചിത്രത്തിന് തിരക്കഥ ഒരുക്കിയിരിക്കുന്നത്. ആദർശ് സുകുമാരൻ, ഷഹബാസ് റഷീദ് എന്നിവരുടേതാണ് സംഭാഷണങ്ങൾ.
ഒരു സമ്പൂർണ്ണ ആക്ഷൻ ത്രില്ലറായി ഒരുങ്ങുന്ന ചിത്രത്തിന്റെ ഏറ്റവും വലിയ സവിശേഷത അതിന്റെ സംഘട്ടന സംവിധാനമാണ്. കെജിഎഫ്, വിക്രം, ലിയോ, സലാർ, കൈതി, കബാലി തുടങ്ങിയ ബ്രഹ്മാണ്ഡ പാൻ ഇന്ത്യൻ ചിത്രങ്ങൾക്ക് ആക്ഷൻ ഒരുക്കിയ അൻപറിവ് മാസ്റ്റേഴ്സ് ആണ് “ഐ ആം ഗെയിം” നു വേണ്ടിയും ആക്ഷൻ കൊറിയോഗ്രാഫി നിർവഹിക്കുന്നത്. ആർഡിഎക്സിലെ ഗംഭീര ആക്ഷൻ രംഗങ്ങൾക്ക് ശേഷം നഹാസ് ഹിദായത്തും അൻപറിവ് ടീമും വീണ്ടും ഒന്നിക്കുന്നു എന്നത് ചിത്രത്തിന് നൽകുന്ന ഹൈപ്പ് ചെറുതല്ല. ചിത്രീകരണം പുരോഗമിക്കുന്ന ഈ സിനിമ മലയാള സിനിമാലോകം വലിയ പ്രതീക്ഷയോടെ കാത്തിരിക്കുന്ന ഒന്നായി മാറിക്കഴിഞ്ഞു.
ഛായാഗ്രഹണം- ജിംഷി ഖാലിദ്, സംഗീതം- ജേക്സ് ബിജോയ്, എഡിറ്റിംഗ്- ചമൻ ചാക്കോ, പ്രൊഡക്ഷൻ ഡിസൈനർ- അജയൻ ചാലിശ്ശേരി, മേക്കപ്പ് – റോണക്സ് സേവ്യർ. കോസ്റ്റ്യൂം- മഷർ ഹംസ, പ്രൊഡക്ഷൻ കൺട്രോളർ- ദീപക് പരമേശ്വരൻ, അസോസിയേറ്റ് ഡയറക്ടർ- രോഹിത് ചന്ദ്രശേഖർ. ഗാനരചന- മനു മഞ്ജിത്ത്, വിനായക് ശശികുമാർ, VFX – തൗഫീഖ് – എഗ്വൈറ്റ്, പോസ്റ്റർ ഡിസൈൻ- ടെൻ പോയിന്റ്, സൗണ്ട് ഡിസൈൻ- സിങ്ക് സിനിമ, സൗണ്ട് മിക്സ് – കണ്ണൻ ഗണപത്, സ്റ്റിൽസ്- എസ് ബി കെ, പിആർഒ- ശബരി

